اسلام آباد، رہنما پاکستان مسلم لیگ (ن) اور پی ٹی آئی سے مذاکرات کرنیوالی کمیٹی کے ترجمان عرفان صدیقی کا کہنا ہے کہ اگر پی ٹی آئی میں راستے بند کرنے کے بجائے کھولنے کی سوچ پیدا ہو رہی ہے تو یہ اچھی بات ہے۔
نجی ٹی وی چینل کے پروگرام میں گفتگو کے دوران سینیٹر عرفان صدیقی کا کہنا ہے کہ پی ٹی آئی جو مطالبات لائی ہے وہ بڑے مطالبات ہیں، یہ مطالبات ایسے نہیں کہ ہم فوری اس پر ردعمل دیں، جہاں کہیں گنجائش نکلے گی ضرور نکالیں گے۔
عرفان صدیقی کا کہنا ہے کہ پی ٹی آئی کو ہماری حدود کا علم ہے، انہیں پتا ہے کہ حکومت قیدیوں کو کتنی رعایت دے سکتی ہے۔
سینیٹر عرفان صدیقی نے کہا کہ اگر پی ٹی آئی میں راستے بند کرنے کے بجائے راستے کھولنے کی سوچ پیدا ہو رہی ہے تو یہ اچھی بات ہے، اسٹیبلشمنٹ کے حوالے سے بھی اُن کے دل میں نرم گوشہ پیدا ہو رہا ہے جو بہت اچھی پیشرفت ہے۔
یاد رہے کہ حکومت اور پی ٹی آئی کے درمیان گزشتہ ماہ مذاکرات کا باقاعدہ آغاز ہوا تھا جبکہ مذاکرات کا دوسرا دور آج ہوگا جس میں پی ٹی آئی اپنے مطالبات حکومت کے سامنے رکھے گی۔
دوسری جانب وزیراعظم پاکستان شہباز شریف کی جانب سے مہنگائی 81 ماہ کی کم ترین شرح پر پہنچنے پر اطمینان کا اظہار کیاگیا ہے۔
