شہر قائد کے علاقے لانڈھی شیرپاؤ کالونی کے رہائشی دوست نے دوست کو فائرنگ کر کے قتل کر دیا اور موقع سے فرار ہوگیا۔
کراچی کے علاقے لانڈھی شیرپاؤ کالونی میں ایک افسوسناک واقعہ پیش آیا، جہاں ایک دوست نے اپنے ہی دوست کو فائرنگ کر کے قتل کر دیا اور موقع سے فرار ہو گیا۔
تفصیلات کے مطابق، قائدآباد کے علاقے شیرپاؤ کالونی میں فائرنگ کے نتیجے میں ایک شخص جاں بحق ہو گیا۔ مقتول کی لاش کو چھیپا ایمبولینس کے ذریعے جناح اسپتال منتقل کیا گیا۔ ایس ایچ او قائدآباد انسپکٹر فراصت نے بتایا کہ مقتول کی شناخت 40 سالہ جان محمد ولد فیروز خان کے نام سے کی گئی۔ مقتول شیرپاؤ کالونی کا رہائشی اور بے روزگار تھا، جبکہ اس کا تعلق ضلع بٹگرام سے تھا۔
پولیس کے مطابق، مقتول کا اپنے گاؤں کے ایک شخص قدوس سے پرانی دشمنی چل رہی تھی۔ حالانکہ دو روز قبل دونوں نے ایک شادی کی تقریب میں اکٹھے بیٹھ کر کھانا کھایا تھا، مگر واقعے کے وقت دونوں گھر کے قریب بیٹھے ہوئے تھے۔
اسی دوران پرانی دشمنی پر تلخ کلامی ہوئی، جس کے بعد ملزم قدوس نے جان محمد پر فائرنگ کر کے اسے ہلاک کر دیا اور موقع سے فرار ہو گیا۔ پولیس نے قتل میں ملوث ملزم کی تلاش شروع کر دی ہے۔
