ذرائع کے مطابق پی ٹی آئی مذاکراتی کمیٹی نے پارٹی قیادت سے مشاورت کے بعد چارٹر آف ڈیمانڈ تیار کرلیا ہے۔
پاکستان تحریک انصاف (پی ٹی آئی) نے حکومت کے ساتھ مذاکرات کے لیے اپنی کمیٹی کے ذریعے پیش کیے جانے والے چارٹر آف ڈیمانڈ کو حتمی شکل دے دی ہے۔ نجی ٹی وی چینل کے مطابق، یہ چارٹر پارٹی قیادت سے مشاورت کے بعد تیار کیا گیا ہے اور بانی چیئرمین کی ہدایات کو مدنظر رکھتے ہوئے مطالبات کی فہرست ترتیب دی گئی ہے۔
ذرائع کے مطابق پی ٹی آئی کا چارٹر آف ڈیمانڈ مختصر رکھا گیا ہے اور اس میں صرف دو مطالبات شامل ہیں۔ پہلا مطالبہ تمام سیاسی قیدیوں کی فوری رہائی کا ہے جبکہ دوسرا مطالبہ 9 مئی اور 26 نومبر کے واقعات کی تحقیقات کے لیے جوڈیشل کمیشن کی تشکیل ہے۔
کل ہونے والے مذاکراتی اجلاس میں پی ٹی آئی کے تمام کمیٹی اراکین کی شرکت متوقع ہے۔ یاد رہے کہ پی ٹی آئی اور حکومت کے درمیان ابتدائی مذاکرات 23 دسمبر کو اسپیکر قومی اسمبلی ایاز صادق کی ثالثی میں ہوئے تھے، جس میں دونوں فریقین نے مذاکرات جاری رکھنے پر اتفاق کیا تھا۔
مذاکرات کا دوسرا دور 2 جنوری کو شیڈول کیا گیا ہے، جہاں ان مطالبات پر مزید تفصیلی بات چیت کی جائے گی۔
