پنجاب کی سینیئروزیر مریم اورنگزیب نے کہنا ہے گزشتہ برس پنجاب میں 95 فیصد اینٹوں کے بھٹوں کو زگ زیگ طریقہ کار پرمنتقل کیا گیا۔
لاہور: پنجاب کی سینئر وزیر مریم اورنگزیب نے کہا ہے کہ صوبے میں ماحولیاتی آلودگی کے خلاف موثر کارروائیوں کے تحت 95 فیصد اینٹوں کے بھٹوں کو زگ زیگ ٹیکنالوجی پر منتقل کیا جا چکا ہے، جبکہ باقی 5 فیصد پر کام جاری ہے۔
وزیر کا کہنا ہے کہ غیر قانونی بھٹوں کے خلاف سخت اقدامات اٹھائے گئے ہیں، جن میں 1191 بھٹوں کی مسماری اور 1335 کی سیلنگ شامل ہے۔ گزشتہ 10 دنوں میں، ادارہ تحفظ ماحولیات پنجاب نے زگ زیگ پر منتقل نہ ہونے والے بھٹوں کے خلاف کارروائی کرتے ہوئے مختلف اضلاع میں کل 25 بھٹے مسمار کیے۔
پنجاب میں ماحولیاتی قوانین کی خلاف ورزی کرنے والے 22 صنعتی یونٹس بند اور 29 یونٹس سیل کیے گئے ہیں، جن میں ٹیکسٹائل، اسٹیل ملز، رائس ملز، اور پلاسٹک فائبر یونٹس شامل ہیں۔
مریم اورنگزیب نے کہا کہ آلودگی پھیلانے والے عناصر کو کسی صورت معاف نہیں کیا جائے گا، اور عوامی صحت کو بہتر بنانے کے لیے بھٹوں اور صنعتوں کی نگرانی کے لیے خصوصی ٹیمیں تشکیل دی گئی ہیں۔
ان کے مطابق، غیر قانونی بھٹوں کی بندش سے نہ صرف آلودگی میں کمی ہوگی بلکہ زرعی پیداوار میں بھی بہتری آئے گی۔ ماحولیاتی قوانین کی پاسداری صنعتی شعبے کی ذمہ داری ہے، اور صاف ہوا کے لیے حکومت اور عوام کو مل کر کام کرنا ہوگا۔
