کراچی میں ایک اور مذہبی جماعت نے شہر کے 9 مختلف مقامات پر دھرنے دے دیے۔
صوبائی دارالحکومت کراچی میں ایک اور مذہبی جماعت کے کارکنان کی جانب سے شہر کے 9 مختلف مقامات پر دھرنے دے دیے گئے۔
اسٹار گیٹ شارع فیصل، کورنگی، ٹاور، پرانی سبزی منڈی، گرومندر، ناگن چورنگی، عیسیٰ نگری، برنس روڈ اور قیوم آباد پر دھرنوں سے ٹریفک کی روانی شدید متاثر ہے۔
کراچی شہر کی مختلف سڑکوں پر گاڑیوں کی طویل قطاریں لگ گئیں اور شہریوں کو شدید مشکلات کا سامنا ہے۔
اورنگی ٹاؤن پونے 5 نمبر پر مذہبی جماعت کے دھرنا کی وجہ سے سڑک ٹریفک کیلئے بند کردی گئی۔
دوسری جانب پارا چنار میں قیام امن کے لیے کراچی میں کچھ دنوں سے کئی مقامات پر دھرنا دینے والی جماعت کے دھرنے آج صرف 4 رہ گئے۔
نمائش چورنگی ایم اے جناح روڈ پر مرکزی دھرنے پر پولیس نے کارروائی کی، مظاہرین نے پولیس موبائل، پولیس چوکی اور اہل کاروں کی 6 موٹر سائیکلیں جلادیں جبکہ پتھراؤ سے پولیس اہلکار زخمی ہو گیا۔
پولیس کی جانب سے نمائش چورنگی سے متعدد مظاہرین کو حراست میں لے لیاگیا ، کامران چورنگی، گلستان جوہر، عباس ٹاؤن اور گولی مار میں دھرنے جاری ہیں۔
