لاہور میں نیو ایئر نائٹ پر آتشبازی پر مکمل پابندی عائد کردی گئی۔
لاہور، صوبائی دارالحکومت لاہور میں نیو ایئر نائٹ پر آتشبازی پر مکمل پابندی عائد کردی گئی، انوائرمنٹ پروٹیکشن ایجنسی کی جانب سے باقاعدہ طور پر نوٹیفکیشن جاری کر دیا گیا۔
ڈپٹی کمشنر لاہور سید موسیٰ رضا کا کہنا ہے کہ نئے سال کی آمد پر کسی قسم کی آتش بازی نہیں کی جائے گی، خلاف ورزی پر بلا امتیاز سخت کارروائیاں عمل میں لائی جائیں گی، فضا میں آلودگی کے پیش نظر پابندی کا نوٹیفکیشن جاری کیا گیا ہے۔
ڈپٹی کمشنر نے کہا کہ ضلعی انتظامیہ سموگ کے تدارک کیلئے کوشاں ہے شہری بھی تعاون کریں، بچوں، بزرگوں اور بیمار افراد کو خاص طور پر سموگ کے مضر اثرات سے محفوظ رکھیں، صحت کا خیال رکھنا اولین ترجیح ہے۔
ڈی سی لاہور نے کہا کہ فضائی آلودگی شہریوں میں صحت کے مسائل کا باعث بن سکتی ہے، صاف اور صحت مند ماحول کے لیے سخت اقدامات جاری ہیں۔
متعلقہ ایس ایچ اوز کی جانب سے بھی مختلف علاقوں میں وارننگز دی گئی ہیں کہ ہوائی فائرنگ کرنیوالوں کیخلاف بلاامتیاز کارروائیاں کی جائیں گی۔۔
