گلگت کی انسداد دہشت گردی عدالت کی جانب سے سابق وزیراعلیٰ گلگت بلتستان (جی بی) خالد خورشید کو 34 سال قید کی سزا سنادی گئی۔
گلگت کی انسداد دہشت گردی عدالت میں سابق وزیر اعلیٰ جی بی کے خلاف سنگین نتائج کی دھمکیاں دینے سے متعلق کیس کی سماعت ہوئی۔
عدالت کی جانب سے جرم ثابت ہونے پر سابق وزیر اعلیٰ کو 34 سال قید کی سزا سنائی گئی، عدالت نے خالد خورشید پر 6 لاکھ روپے جرمانہ بھی عائد کردیا۔
عدالت نے آئی جی پولیس کو حکم دیا کہ مجرم کو گرفتار کرکے جیل منتقل کیا جائے، علاوہ ازیں مجرم کا شناختی کارڈ بلاک کرنے کا بھی حکم دیا گیا۔
یاد رہے کہ خالد خورشید پر 26 مئی 2024 کو جلسے میں سکیورٹی اداروں کو سنگین نتائج کی دھمکی دینے کا الزام تھا، علاوہ ازیں سابق وزیراعلیٰ پر چیف سیکرٹری اور چیف الیکشن کمشنر جی بی کو بھی سنگین نتائج کی دھمکیاں دینے کا الزام تھا۔
سابق وزیراعلیٰ کے خلاف انسداد دہشت گردی ایکٹ کے تحت سٹی تھانہ گلگت میں مقدمے کا اندراج بھی کیا گیا تھا۔
واضح رہے کہ خالد خورشید مقدمے کی کارروائی سے غیر حاضر اور روپوش رہے۔
