پی ٹی آئی کی جانب سے مشاورت کے بعد 2 مطالبات حکومت کے سامنے رکھنے کا فیصلہ کر لیا گیا۔
ذرائع کا بتانا ہے کہ پی ٹی آئی کے رہنماؤں کی جانب سے جوڈیشل کمیشن بنانے اور قیدیوں کی رہائی کے مطالبے پر مشاورت کی گئی۔
ذرائع کے مطابق پی ٹی آئی تحریری طور پر دو ہی مطالبات حکومتی ٹیم کے سامنے رکھے گی، پی ٹی آئی 9 مئی اور 26 نومبر واقعات کی تحقیقات کے لیے جوڈیشل کمیشن کا تحریری مطالبہ رکھے گی۔
ذرائع کے مطابق تحریک انصاف جیلوں میں بند اپنے کارکنوں کی رہائی کا تحریری مطالبہ سامنے رکھے گی۔
پی ٹی آئی اور حکومت کی مذاکراتی کمیٹیوں کے درمیان مذاکرات 2 جنوری کو ہوں گے۔
دوسری جانب رہنما پی ٹی آئی اسد قیصر نے کہا کہ حکومت سے ہمارے مذاکرت 2 تاریخ کو ہوں گے جس کے لیے اپنی مذاکرتی ٹیم سے مشاورت کر رہے ہیں اور آپس کی ملاقاتیں بھی جاری ہیں۔
اسد قیصر کا کہنا ہے کہ ہمارے مطالبات واضح ہیں اور بانی کی رہائی سمیت کمیشن بنایا جائے، ملک کو آگے لے جانے کے لیے ہر ممکن تعاون کی کوشش کریں گے۔
رہنما پی ٹی آئی کا کہنا تھا کہ تمام مذاکرتی ٹیم کے ارکان اگلی نشست کا حصہ ہوں گے۔
