لاہور، گورنر پنجاب سردار سلیم حیدر خان کا کہنا ہے کہ پاکستان اور متحدہ عرب امارات کے مابین تعلقات کو مزید بلندیوں تک لے کر جانا چاہتے ہیں۔
گورنر پنجاب سے متحدہ عرب امارات کے سفیر حماد عبید الزابی کی جانب سے ملاقات کی گئی، جس میں دو طرفہ تعلقات کو اقتصادی شعبے میں وسعت دینے پر تبادلہ خیال کیا گیا، سردار سلیم حیدر خان نے پاکستانیوں بالخصوص طلبہ کو ویزا ملنے میں مشکلات سے بھی آگاہ کیا۔
اس موقع پر گورنر پنجاب نے کہا کہ پاکستان اور متحدہ عرب امارات کے درمیان گہرے برادرانہ تعلقات ہیں، پاکستان اور یو اے ای کے مابین تعلقات کو مزید بلندیوں تک لے کر جانا چاہتے ہیں، معیشت کی ترقی حکومت کی اولین ترجیح ہے۔
سردار سلیم حیدر کا کہنا ہے کہ یو اے ای کی کمپنیاں پاکستان میں مختلف شعبوں میں سرمایہ کاری کرسکتی ہیں، پاکستانی یو اے ای کو اپنا دوسرا گھر سمجھتے ہیں۔
یو اے ای کے سفیر حماد عبید الزابی نے کہا کہ پاکستان کے ساتھ قابل تجدید توانائی کے شعبے میں تعاون کے منصوبوں پر کام کرنے کے وسیع امکانات ہیں، ویزا کے حوالے سے مسائل حل کرنے پر کام کر رہے ہیں۔
