سیکرٹری اطلاعات پی ٹی آئی شیخ وقاص اکرم نے چیئرمین پیپلز پارٹی بلاول بھٹو زرداری کو ناراض سیاسی بچہ قرار دیدیا۔
اسلام آباد، سیکرٹری اطلاعات پی ٹی آئی شیخ وقاص اکرم کی جانب سے چیئرمین پیپلز پارٹی بلاول بھٹو زرداری کو ناراض سیاسی بچہ قرار دیتے ہوئے دعویٰ کیا گیا ہے کہ زرداری اور شریف خاندانوں کا سیاسی خاتمہ قریب ہے۔
وزیر دفاع خواجہ آصف اور چیئرمین پیپلز پارٹی بلاول بھٹو زرداری کے بیانات پر ردعمل دیتے ہوئے شیخ وقاص اکرم کا کہنا تھا کہ یہ سیاسی مداری اندرون خانہ اس بات کو تسلیم کرتے ہیں کہ سابق وزیراعظم عمران خان ہی پاکستان کی واحد سیاسی حقیقت ہے جس نے ملکی ترقی کیلئے اپنے سکون و آرام کی قربانی دی۔
خواجہ آصف نے میڈیا کوریج اور عوامی توجہ حاصل کرنے کیلئے سابق وزیراعظم عمران خان کو تنقید کا نشانہ بنانے والوں کو نوازشریف اور آصف زرداری کا درباری اور سیاسی مداری قرار دیتے ہوئے کہا کہ عمران خان عالمی سطح کے رہنما ہیں جبکہ ان کے نقاد محض اپنے آقاؤں کے پیادے ہیں جن کا کام بلاجواز تنقید کرنا ہے کیونکہ شریف اور زرداری جیسے کرپٹ اور پرانے سیاسی خاندانوں کا سیاسی خاتمہ قریب ہے۔
وزیر دفاع کی جانب سے الزام عائد کیا گیا کہ اقتدار کے لالچی افراد کا یہ اتحاد ملکی مفادات کیلئے نہیں بلکہ عمران خان کو سیاسی منظر نامے سے باہر کرنے کیلئے ہے تاہم ان کا یہ مذموم منصوبہ الٹا پڑگیا اور وہ عمران خان کو سائیڈ لائن کرنے میں ناکام ہوگئے۔
شیخ وقاص اکرم نے بلاول بھٹو زرداری کو ناراض سیاسی بچہ قرار دیتے ہوئے مشورہ دیا کہ وہ سابق وزیراعظم عمران خان جیسے عالمی رہنما کی بجائے اپنی سطح کے سیاسی لیڈران کے ساتھ بحث پر توجہ مرکوز رکھیں، بدقسمتی سے زرداری کی تاریخ رہی ہے کہ وہ اپنے سیاسی طور پر ناپختہ نوجوان بیٹے کو مسلم لیگ (ن) پر دباؤ ڈالنے کے لئے استعمال کرتے ہیں تاکہ شریفوں کو نشانہ بنا کر مذاکرات میں فائدہ اٹھایا جاسکے۔
