صوبائی وزیراطلاعات عظمیٰ بخاری کا کہنا ہے کہ پنجاب کے عوام فتنہ اور احتجاج کی سیاست کو سپورٹ نہیں کرتے۔
لاہور میں پریس کانفرنس کے دوران وزیراطلاعات پنجاب عظمیٰ بخاری نے کہا کہ وزیراعلیٰ مریم نواز کا حکومتی معاملات چلانے کا ایک سال مکمل ہونے والا ہے، میرے پاس پچھلے 10 ماہ کا رپورٹ کارڈ موجود ہے، کہا تھا وزیراعلیٰ مریم نواز کے اقدامات فائلوں کیلئے نہیں ہیں۔
عظمیٰ بخاری کا کہنا ہے کہ یہ سال عوام کو بہت سی خوشخبریاں دے کر جائے گا، سٹاک ایکسچینج میں 1400 پوائنٹس کا اضافہ ہوا ہے، مہنگائی اس وقت 4 اور 5 فیصد کے درمیان ہے، وزیراعلیٰ پنجاب کیلئے یہ سال اہمیت کا حامل ہے، وزیراعلیٰ مریم نواز کے پاس پہلے کبھی حکومتی عہدہ نہیں رہا، وزیراعلیٰ مریم نواز کیلئے یہ ایک نیا تجربہ تھا۔
صوبائی وزیر کا کہنا تھا کہ وزیراعلیٰ پنجاب نے ثابت کیا کہ کارکردگی کیلئے یہ ضروری نہیں کہ کتنی باری ہے، کارکردگی ثابت کرنے کیلئے اہل ہونا ضروری ہے، خیبرپختونخوا میں بھی ایک حکومت ہے، کرم اور پاراچنار کے حالات سب کے سامنے ہیں، کرم اور پاراچنار کی سڑکیں کھلوانا گنڈاپور کا کام ہے، حالات خراب کرنے کی سیاست کو پنجاب کے عوام سپورٹ نہیں کرتے۔
عظمیٰ بخاری کا کہنا ہے کہ پنجاب میں 64 لاکھ خاندانوں کو گھر کی دہلیز پر رمضان پیکیج دیا گیا، لوگوں کے گھروں تک عزت کے ساتھ رمضان پیکیج پہنچا، تاریخ میں پہلی بار پنجاب میں روٹی کی قیمت متعین کی گئی، وزیراعلیٰ مریم نواز نے ایئرایمبولینس شروع کی، ایئرایمبولینس والی بات پر بہت سے سیاسی غریب اور یتیم آگئے تھے۔
صوبائی وزیر کا کہنا تھا کہ پنجاب میں 27 ہزار طلبہ کو الیکٹرک بائیکس میرٹ پر تقسیم کی گئیں، الیکٹرک بائیکس کی تعداد کو بڑھا کر ایک لاکھ کر دیا گیا۔
عظمیٰ بخاری کا کہنا ہے کہ نیوٹریشن پروگرام کا آغاز غذائی قلت کے شکار بچوں کیلئے کیا گیا، اسکولوں کی ری آرگنائزیشن شروع کی گئی ہے، نئے سکولوں کی تعمیر نو، نئی نرسری اور بوٹی مافیا کا خاتمہ ہوا ہے، ہم نوجوانوں کو شرمز فارمنگ کیلئے آسان قرضے دیں گے، بہت سارے ملک ہیں جنہوں نے شرمز فارمنگ سے بہت سارا زرمبادلہ کمایا۔
