سابق وزیراعظم عمران خان نے پی اے سی چئیرمین شپ نہ ملنے پر قائمہ کمیٹیوں کی چئیرمین شپ سے بھی مستعفی ہونے کا عندیہ دے دیا۔
اسلام آباد، قومی اسمبلی کی پبلک اکاؤنٹس کمیٹی (پی اے سی) کے چیئرمین کی نامزدگی کے معاملے پر سابق وزیراعظم عمران خان نے اپنے دیے گئے نام پر فل اسٹاپ لگاتے ہوئے عہدے کے لیے شیخ وقاص اکرم کا نام برقرار رکھا اور کہا ہے اس حوالے سے فیصلہ میں کروں گا، کوئی حکومتی عہدیدار نہیں۔
ذرائع کی جانب سے دعویٰ کیا گیا کہ چیئرمین پی اے سی کی نامزدگی کے معاملے پر رد عمل دیتے ہوئے نامزدگی کے معاملے پر بانی پی ٹی آئی نے قیادت کی سرزنش کی۔
ذرائع کا بتانا ہے کہ عمران خان نے کہا کہ پی ٹی آئی سے چیئرمین پی اے سی کون ہو گا فیصلہ میں کروں گا، شہباز شریف یا دیگر حکومتی عہدیدار نہیں، میری طرف سے چیئرمین پی اے سی کے لئے پہلا دوسرا، تیسرا اور چوتھا نام بھی شیخ وقاص اکرم ہی ہوگا۔
ذرائع کے مطابق سابق وزیراعظم نے پی اے سی چیئرمین شپ نہ ملنے پر قائمہ کمیٹیوں کی چیئرمین شپ سے بھی مستعفی ہونے کا عندیہ دے دیا۔
طارق فضل چوہدری کی جانب سے دو بار خط لکھا گیا تھا، پی ٹی آئی نے پہلے جوابی خط میں شیخ وقاص اکرم کا نام دیا تھا، دوسرے خط میں مسلم لیگ (ن) کے چیف وہپ کی جانب سے 4 ناموں کا پینل مانگا گیا تھا۔
اس پر تحریک انصاف نے عمران خان کی مشاورت کے بعد شیخ وقاص اکرم کا نام مقرر رکھا تھا اور یہ کہا تھا کہ ہمارا پہلا نام، دوسرا نام، تیسرا نام اور چوتھا نام بھی شیخ وقاص اکرم ہی ہوگا۔
پی ٹی آئی اپنا حتمی جواب آئندہ ہفتے جمع کروائے گی۔
