کوئٹہ، حکومت بلوچستان کی جانب سے صوبے میں بے نظیر کسان کارڈ متعارف کرانے کا فیصلہ کر لیا گیا۔
ترجمان صوبائی حکومت شاہد رند کا بتانا ہے کہ وزیر اعلیٰ بلوچستان میر سرفراز بگٹی کی جانب سے محکمہ زراعت کی سمری پر کسان کارڈ کی منظوری دے دی گئی، کسان کارڈ کے تحت بلوچستان کے چھوٹے زمینداروں کو سبسڈی دی جائے گی۔
شاہد رند کے مطابق وزیراعلیٰ بلوچستان میر سرفراز بگٹی نے پہلے مرحلے کی منظوری دے دی، کسان کارڈ کے لئے محکمہ انفارمیشن ٹیکنالوجی دو سال کے لئے کلاؤڈ سسٹم قائم کرے گی۔
ترجمان بلوچستان حکومت شاہد رند کا کہنا ہے کہ کسان کارڈ صدر آصف علی زرداری، وزیر اعظم محمد شہباز شریف کے کسان دوست وژن کا حصہ ہے، چیئرمین پیپلز پارٹی بلاول بھٹو نے سندھ اور بلوچستان کے ہاریوں کی بہبود کیلئے جامع حکمت عملی پر کام کرنے کی ہدایت کی ہے۔
شاہد رند کا کہنا ہے کہ کسان کارڈ کا پہلا مرحلہ بلوچستان حکومت اپنے وسائل سے شروع کر رہی ہے، دوسرے مرحلے میں وفاقی حکومت سے معاونت حاصل کی جائے گی۔