اسلام آباد، ترجمان دفتر خارجہ کا کہنا ہے کہ پاکستان نے افغانستان کے ساتھ بارڈر کےعلاقوں میں آپریشن کیے ہیں۔
نجی ٹی وی چینل نے بتایا ہے کہ افغانستان میں ایئر سٹرائیکس کے سوال پر ترجمان دفتر خارجہ ممتاز زہرا بلوچ نے ردعمل دیتے ہوئے کہا کہ پاکستان اپنے لوگوں کی سیکیورٹی کیلئے پرعزم ہے۔
ترجمان دفتر خارجہ کا کہنا ہے کہ بارڈر کے علاقوں میں سیکیورٹی فورسز کی جانب سے آپریشن کیے گئے ہیں اور بارڈر ایریا میں یہ آپریشنز انٹیلی جنس اطلاعات اور ثبوتوں کی بنیادوں پر کیے جاتے ہیں۔
ممتاز زہرا بلوچ کا کہنا تھا کہ ان کارروائیوں کا مقصد پاکستانی شہریوں کو ٹی ٹی پی اور دیگر دہشت گردوں سے بچانا ہے۔
پاکستان افغانستان کے ساتھ گزشتہ دنوں سے ہی رابطے میں ہے اور نمائندہ خصوصی برائے افغانستان صادق خان اس وقت کابل میں موجود ہیں، صادق خان نے افغان وزیر داخلہ، وزیر خارجہ، نائب وزیر اعظم اور دیگر لوگوں سے ملاقات کی ہے اور ملاقاتوں میں سیکیورٹی صورتحال، بارڈر مینجمنٹ اور تجارت پر بات چیت کی گئی۔
دفتر خارجہ نے کہا کہ پاکستان افغانستان کی خودمختاری اور سالمیت کی عزت کرتا ہے، ہم نے ہمیشہ بات چیت اور سفارتکاری پر توجہ دی ہے۔
سرحد پار دہشت گردوں کی محفوظ پناہ گاہوں اور سرحد پار دہشت گردی کے باوجود ہم افغانستان سے رابطے میں ہیں، پاکستان اور افغانستان سیکیورٹی، بارڈر مینجمنٹ، تجارت اور دیگر معاملات پر بات چیت کیلئے رابطہ میں رہتے ہیں۔
ممتاز زہرا بلوچ کا کہنا ہے کہ معاشی تعاون اور سرمایہ کاری میں اضافے کیلئے کوشاں ہیں، اپنے شراکت داروں کے ساتھ اہم علاقائی وعالمی امور پر تعاون کیلئے پر عزم ہیں، یورپی یونین کی جانب سے پی آئی اے کی پروازوں پر پابندی کا خاتمہ اہم پیشرفت ہے۔
