لاہور، وزیر اطلاعات پنجاب عظمیٰ بخاری کا کہنا ہے کہ پی ٹی آئی ایک طرف مذاکرات کا ڈرامہ کھیل رہی ہے اور دوسری طرف سول نافرمانی کی تحریک کا ڈھنڈورا پیٹ رہی ہے۔
نجی ٹی وی چینل کے مطابق عظمیٰ بخاری کا کہنا ہے کہ پی ٹی آئی کے سرکردہ شیرو اور ٹائیگرز سوشل میڈیا پر اوورسیز پاکستانیوں کو ترسیلات زر نہ بھیجنے پر اکسا رہے ہیں، زلفی بخاری، شہباز گل اور شہزاد اکبر جیسے غیرملکی ٹاؤٹ اس مہم میں پیش پیش ہیں۔
اوورسیز پاکستانیوں کی جانب سے فتنے اور فتنہ پارٹی کی ملک دشمنی کو مسترد کردیا گیا، سمندر پار پاکستانیوں نے رواں سال ملکی تاریخ کے سب سے زیادہ ریکارڈ ترسیلات زر بھیجے ہیں۔
سینئر صوبائی مشیر اطلاعات کا کہنا ہے کہ اڈیالہ جیل کے قیدی نے ڈیڑھ سال قوم کو بتایا کہ میں آپ کو امریکی غلامی سے آزاد کراؤں گا، اب ایک مہینے سے امریکی لابی کو پاکستان میں مداخلت کی درخواستیں کر رہے ہیں، اڈیالہ جیل کا قیدی این آر او مانگنے کے لئے کسی کے بھی پاؤں پکڑنے کے لئے تیار بیٹھا ہے۔
عظمیٰ بخاری نے کہا کہ پاکستان ایک آزاد اور خود مختار ملک ہے، وزیراعظم شہباز شریف نے امریکا کو دو ٹوک الفاظ میں ایبسولیوٹلی ناٹ کہہ دیا ہے، پاکستان اپنے اندرونی معاملات میں کسی کو مداخلت کی اجازت نہیں دے گا۔
