بھارت میں ایک شخص نے اپنی خودکشی سے پہلے دل دہلا دینے والا پیغام جاری کردیا۔
غیر ملکی میڈیا کا بتانا ہے کہ ریاست مدھیہ پردیش کے ضلع خاندوا میں 37 سالہ شخص نے زہر کھا کر اپنی زندگی کا خاتمہ کر لیا لیکن خودکشی سے قبل متعلقہ شخص کی جانب سے ایک ویڈیو پیغام بھی ریکارڈ کیا گیا۔
پولیس کا بتانا ہے کہ خودکشی کرنیوالے شخص کے موبائل سے 4 منٹ کا ایک ویڈیو پیغام برآمد ہوا جس میں اس نے انتہائی اقدام کا ذمہ دار اپنی اہلیہ اور اس کے آشنا کو قرار دیا۔
غیر ملکی میڈیا کے مطابق اپنے پیغام میں متاثرہ شخص نے الزام عائد کیا کہ اس کی بیوی اور بیوی کا آشنا جو اس کے ساتھ غیر اخلاقی حرکات کرتا تھا، دونوں اسے ہراساں کرتے تھے، میں کئی روز سے شدید ذہنی تناؤ کا شکار تھا۔
خودکشی کرنیوالے شخص کا اپنے ویڈیو پیغام میں کہنا تھا اسے انصاف چاہیے، زوجہ اور اس کے آشنا کو ان کے کیے کی سزا ملنی چاہیے، میں اپنی بیوی کے ساتھ رہنا چاہتا تھا لیکن وہ میرے ساتھ نہیں رہنا چاہتی تھی۔
پولیس کے مطابق خودکشی کرنیوالے شخص کے موبائل سے سامنے آنے والی ویڈیو کو لیکر معاملے کی مزید تحقیقات کا آغاز کر دیا گیا ہے۔
یاد رہے کہ چند روز پہلے بھی ایک واقعہ سامنے آیا تھا جس میں بھارتی شہر بنگلورو سے تعلق رکھنے والے ایک ٹیچر نے اپنی زندگی کا خاتمہ کرنے سے پہلے ایک طویل ویڈیو بنائی تھی جس میں اس نے خودکشی کا الزام اپنی اہلیہ اور سسرال والوں پر عائد کیا تھا۔
