اسلام آباد، وفاقی وزیر اطلاعات و نشریات عطاء اللہ تارڑ کا کہنا ہے کہ پاکستان اور ترکیہ کی لازوال دوستی سرحدوں یا اچھے بُرے وقت کی محتاج نہیں۔
اسلام آباد میں تقریب سے خطاب کرتے ہوئے عطاء اللہ تارڑ کا کہنا تھا کہ ہمارے دوست ممالک کے ساتھ اچھے تعلقات ہیں، ترکیہ نے ہر مشکل وقت میں پاکستان کی مدد کی، پاکستان اور ترکیہ کے درمیان سیاحتی شعبے میں تعاون کے وسیع مواقع موجود ہیں۔
عطا تارڑ کا کہنا ہے کہ پاکستان اور ترکیہ کے درمیان ثقافتی رابطوں اور تبادلوں کو مزید فروغ دینے کی ضرورت ہے، ثقافتی تعاون کے فروغ کیلئے عوامی رابطوں کو بڑھانا ہوگا، پاکستان اور ترکیہ کے درمیان برادرانہ تعلقات قائم ہیں۔
عطاتارڑ نے کہا کہ پاکستان اور ترکیہ کے تعلقات وقت کے ساتھ مضبوط ہوتے جا رہے ہیں، دونوں ملکوں کےعوام ایک دوسرے سے گہرا لگاؤ رکھتے ہیں۔
وفاقی وزیر اطلاعات کا کہنا ہے کہ پاکستان اور ترکیہ کی لازوال دوستی سرحدوں یا اچھے برے وقت کی محتاج نہیں، پاکستان اور ترکیہ کے درمیان بہت سی قدریں مشترک ہیں، دونوں ممالک ثقافت اور مذہب کے ذریعے بھی ایک دوسرے سے جڑے ہیں۔
دوسری جانب وزیراعظم کے مشیر برائے سیاسی امور رانا ثنااللہ کا کہنا ہے کہ پی ٹی آئی سے مذاکرات میں ان باتوں تک پہنچا جاسکتا ہے جس میں دونوں فریقین کے لیے آسانی ہو۔
