وزیر دفاع خواجہ آصف نے کہا کہ آپریشن گولڈ اسمتھ کے ریکروٹ سابق وزیراعظم عمران خان کی نجات کے لیے مہم چلا رہے ہیں۔
خواجہ آصف نے نومنتخب امریکی صدر ڈونلڈ ٹرمپ کے نامزد ایلچی رچرڈ گرینل کے بیان پر ردعمل دیتے ہوئے کہا کہ عمران خان کے لیے مغرب سے آواز اٹھانے والوں پر واضح ہونا چاہیے کہ پاکستانی قوم اپنے مفادات کا تحفظ کرنا جانتی ہے، ہماری اول و آخر ترجیح صرف اور صرف پاکستان ہے۔
وزیر دفاع نے کہا کہ عمران خان کی رہائی کا مطالبہ کرنے والے عناصر کو اسرائیل کی بھرپور حمایت حاصل ہے، اس سے صاف ظاہر ہوتا ہے کہ سابق وزیراعظم اسرائیلی اثاثہ ہے، عمران خان کے ذریعے وہ واحد مسلمان ایٹمی قوت کو خدا نخواستہ سر نِگوں کرنا چاہتے ہیں۔
دوسری جانب ن لیگ کے سینیٹر طلال چوہدری نے پروگرام آج شاہزیب خانزادہ کے ساتھ میں گفتگو کے دوران کہا کہ عمران خان کی رہائی کے لیے حکومت ٹرمپ انتظامیہ کے بیانات سے کوئی دباؤ محسوس نہیں کر رہی، جب یہ لوگ حکومتی نمائندے کے طور پر بات کریں گے تو پاکستانی حکومت بھی جواب دے گی۔
سینیٹر کا کہنا ہے کہ یہ کیسی بات ہے پہلے امریکاعمران خان کو آزادی دلوائے گا اور پھر سابق وزیراعظم قوم کو امریکا سے آزاد کروائیں گے۔
