آذربائیجان کا مسافر بردار طیارہ قازقستان میں گر کر تباہ ہو گیا جس میں متعدد ہلاکتوں کا خدشہ ظاہر کیا جا رہا ہے۔
غیر ملکی میڈیا کے مطابق آذربائیجان کا مسافر بردار طیارہ چیچنیا جا رہا تھا کہ قازقستان کے ایئرپورٹ کے قریب گر کر تباہ ہوگیا۔ سوشل میڈیا پر اس حادثے کی ویڈیوز اور تصاویر وائرل ہو رہی ہیں، جن میں طیارے کو تیزی سے نیچے آتے ہوئے اور پھر زمین سے ٹکرا کر تباہ ہوتے دیکھا جا سکتا ہے۔ طیارے کے زمین سے ٹکرانے کے بعد اس میں آگ بھڑک اٹھی اور دھواں نکلنے لگا۔
میڈیا رپورٹس کے مطابق دھند کے باعث طیارے کا روٹ تبدیل کیا گیا تھا، اور حادثے سے قبل طیارے نے ہنگامی لینڈنگ کی درخواست کی تھی۔ روسی میڈیا کے مطابق طیارے میں 62 مسافر اور 5 ارکان عملہ سوار تھے، جن میں سے 27 افراد بچ نکلنے میں کامیاب ہوئے۔ قازق حکام نے بتایا کہ زخمی 27 افراد کو اسپتال منتقل کر دیا گیا ہے۔
خبر ایجنسی کے مطابق ابتدائی معلومات کے مطابق طیارہ ایک پرندے کے ٹکرانے کے باعث ہنگامی لینڈنگ کرنے کی کوشش کر رہا تھا، اور گروزنی میں دھند کے سبب طیارے کو اپنا رخ بھی تبدیل کرنا پڑا۔
