اسلام آباد، سابق وزیراعظم شاہد خاقان عباسی کا کہنا ہے کہ حکومت کی نیت ٹھیک ہے نہ اپوزیشن کی، جیل جانا وزیراعظم کے عہدے کا حصہ ہے اور وہاں اچھی تربیت ہوتی ہے۔
سابق وزیر اعظم شاہد خاقان عباسی نے میڈیا سے گفتگو کے دوران کہا کہ حکومت اور اپوزیشن کے مذاکرات بند کمروں میں نہیں ہوتے لیکن یہاں مذاکرات ہونے جا رہے ہیں اور اس کا بھی کسی کو علم نہیں۔
شاہد خاقان عباسی کا کہنا ہے کہ حکومت کی نیت ٹھیک ہے اور نہ ہی اپوزیشن کی، جیل جانا وزیر اعظم کے عہدے کا حصہ ہے، جیل میں اچھی تربیت ہوتی ہے، ہم نے بھی جیل میں کافی عرصہ گزارا ہے۔
سابق وزیراعظم کا کہنا ہے کہ سیاست میں راستہ افہام و تفہیم کے ذریعے ہی نکلتا ہے۔
شاہد خاقان عباسی کا کہنا ہے کہ میرے خلاف قومی احتساب بیورو (نیب) میں 9 سال جھوٹا کیس چلتا رہا۔ پاکستان کو اضافی صوبوں کی ضرورت ہے لیکن الگ صوبوں کے قیام پر کبھی عملدرآمد نہیں ہوا۔
دوسری جانب، سینئر صوبائی وزیر شرجیل انعام میمن کا کہنا ہے کہ تحریک انصاف اب لائن پر آگئی، ہر مسئلے کا حل مذاکرات میں ہی ہے۔
کراچی میں میڈیا سے گفتگو کے دوران صوبائی وزیر شرجیل انعام میمن نے کہا کہ کل اپوزیشن کے ساتھ اچھے ماحول میں بات ہوئی، سراہنا چاہیے، پیپلز پارٹی پہلے دن سے کہہ رہی ہے ہر مسئلے کا حل ڈائیلاگ سے ہوتا ہے، پی ٹی آئی پہلے کہتی تھی اس سے نہیں دوسرے سے بات چیت کریں گے۔
