واشنگٹن، امریکہ کے نومنتخب صدر ڈونلڈ ٹرمپ کی جانب سے عہدہ سنبھالنے کے فوراً بعد اہم فیصلے کرنے کا اعلان کیا گیا، جس میں اسکولوں اور مسلح افواج سے خواجہ سراؤں کو نکالنے کا حکم بھی شامل ہے۔
غیر ملکی میڈیا کے مطابق نومنتخب امریکی صدر ڈونلڈ ٹرمپ کا کہنا ہے کہ وہ خواجہ سراؤں کو ایلیمنٹری، مڈل اور ہائی اسکولوں سے نکالنے کے ساتھ ساتھ امریکی فوج میں بھی ان کی بھرتیوں کو روک دیں گے۔
صدر ڈونلڈ ٹرمپ کا کہنا ہے کہ وہ عہدہ سنبھالنے کے بعد سب سے پہلے بچوں کے جنسی استحصال کے خلاف اقدامات اٹھائیں گے، میرے اعلانات حامیوں کے لیے خوش آئند اور مخالفین کے لیے تشویش کا باعث ہوں گے۔
ڈونلڈ ٹرمپ کا کہنا ہے کہ وہ منشیات کے عالمی کارٹیلز کو "غیر ملکی دہشتگرد تنظیم” قرار دیں گے، جس کا مقصد ان کے خلاف سخت کارروائی کرنا اور منشیات کے پھیلاؤ کو روکنا ہے۔
نومنتخب امریکی صدر کا کہنا ہے کہ وہ امریکی حکومت کے زیراہتمام خواتین کے کھیلوں میں مردوں کو حصہ لینے سے روکنے کے لیے بھی اقدامات کریں گے، امریکی حکومت باضابطہ طور پر صرف 2 جنسوں کو تسلیم کرے گی۔ یعنی مرد اور عورت، اور ان کی بنیاد پر ہی پالیسیاں مرتب کی جائیں گی۔
ڈونلڈ ٹرمپ نے کہا کہ وہ اپنی مہم کو سوشل میڈیا کے ذریعے مزید پھیلائیں گے، تاکہ عوام تک اپنے پیغامات پہنچا سکیں۔
