اسلام آباد، رہنما پی ٹی آئی بیرسٹر علی ظفر نے کہا کہ حکومت سے مذاکرات کرنے والی کمیٹی کو فیصلے کا اختیار نہیں ہے۔
حکومت اور پی ٹی آئی کی مذاکراتی کمیٹیوں کے درمیان مذاکرات کا باقاعدہ آغاز ہو گیا ہے اور دونوں کمیٹیوں کے اراکین کا پہلا اجلاس گزشتہ روز اسپیکر چیمبر میں ہوا جس میں فریقین کی جانب سے بات چیت کو جاری رکھنے پر اتفاق کیا گیا۔
اس متعلق رہنما پی ٹی آئی اسد قیصر نے کہا کہ حکومت نے تحریک انصاف کے رہنماؤں کی عمران خان سے ملاقات پر رضامندی ظاہر کی ہے جبکہ سینیٹر عرفان صدیقی نے کہا کہ حکومت کو پی ٹی آئی رہنماؤں کی عمران خان سے ملاقات پر کوئی اعتراض نہیں ہے۔
تاہم پی ٹی آئی رہنما سینیٹر علی ظفر کی جانب سے انکشاف کیا گیا کہ بات چیت کے ذریعے فیصلے کا اختیار کمیٹی کو حاصل نہیں ہے، مذاکراتی کمیٹی بات چیت کرے گی لیکن کوئی بھی فیصلہ کرنا اس کا مینڈیٹ نہیں، ایک انٹرویو میں سینیٹر علی ظفر نے واضح کیا کہ فیصلہ صرف عمران خان کریں گے۔
دوسری جانب رہنما مسلم لیگ ن مصدق ملک کا کہنا ہے کہ سیاست میں ڈائیلاگ کے ذریعے ہی راستہ نکلتا ہے۔
دنیا نیوز کے پروگرام’’آن دی فرنٹ‘‘میں گفتگو کرتے ہوئے مصدق ملک کا کہنا تھا کہ ملک کیلئے اچھی بات ہے سیاسی جماعتیں آپس میں بیٹھ کر بات کررہی ہے، پہلے کوئی ہاتھ ملانے اور بات کرنے کو تیار نہیں تھا، مذاکرات ہونا خوش آئند بات ہے۔
