پشاور، سیکرٹری اطلاعات پی ٹی آئی شیخ وقاص اکرم کا کہنا ہے کہ سویلین کا ملٹری ٹرائل عالمی قوانین کی خلاف ورزی ہے۔
پشاور میں میڈیا سے گفتگو کے دوران شیخ وقاص اکرم نے کہا کہ ملٹری ٹرائل سے متعلق تمام قانونی آپشنز کو استعمال کیا جائے گا، حکومت کی معیشت کو تباہ کرنے کی سازش کو بھی ناکام بنائیں گے۔
وقاص اکرم کا کہنا ہے کہ القادر ٹرسٹ کیس کا فیصلہ ہونا تھا، ہم یہ پوچھنا چاہتے ہیں فیصلے کو کیوں مؤخر کیا گیا؟ ہمیں سمجھ نہیں آرہی کہ یہ فیصلہ کہاں لکھا جارہا ہے، یہ بریت کا کیس ہے اور اس میں کچھ نہیں ہے، 190 ملین پاؤنڈ کیس سیاسی انتقام کی بدترین مثال ہے۔
سیکرٹری اطلاعات نے کہا کہ حکومت سیاسی حریفوں کو ختم کرنے کے لیے بین الاقوامی قوانین کوبھی ختم کرنے کو تیار ہوگئی ہے، حکومت انتقام میں اتنی آگے چلی گئی ہے کہ مخالفین کو ختم کررہی ہے۔
شیخ وقاص اکرم کا کہنا ہے کہ 190 ملین پاؤنڈ کیس سیاسی انتقام ہے جس میں عمران خان اور ان کی اہلیہ بشریٰ بی بی کو سزا دینے کا منصوبہ ہے، کیس عالمی سطح پر بھی زیر بحث ہے۔
دوسری جانب مشیر اطلاعات خیبرپختونخوا بیر سٹرسیف نے کہا کہ ضلع کرم میں امن و امان کے معاملے پر رواں ہفتے اہم پیش رفت متوقع ہے۔
