راولپنڈی کی انسداد دہشتگردی عدالت نے بانی پی ٹی آئی کی اہلیہ بشریٰ بی بی کی 32 مقدمات میں عبوری ضمانت منظور کر لی۔
راولپنڈی کی انسداد دہشتگردی عدالت نے سابق وزیراعظم عمران خان کی اہلیہ بشریٰ بی بی کی 32 مقدمات میں عبوری ضمانت منظور کر لی۔ بشریٰ بی بی نے 26 نومبر کے واقعات سے متعلق راولپنڈی، اٹک، اور چکوال کے مختلف تھانوں میں درج مقدمات میں خود کو عدالت کے سامنے پیش کیا۔
انسداد دہشتگردی عدالت کے جج امجد علی شاہ کی سربراہی میں سماعت ہوئی، جہاں بشریٰ بی بی کے وکیل ایڈووکیٹ محمد فیصل ملک نے ضمانت کی درخواست پر دلائل دیے۔ عدالت نے ان دلائل کو تسلیم کرتے ہوئے بشریٰ بی بی کی عبوری ضمانت 13 جنوری تک منظور کر لی۔ ضمانتی مچلکے بھی بشریٰ بی بی کی جانب سے عدالت میں جمع کرائے گئے۔
پیشی کے دوران بشریٰ بی بی کی گاڑی کو انسداد دہشتگردی عدالت کی حدود میں داخل ہونے کی خصوصی اجازت دی گئی۔ بشریٰ بی بی نے 9 مئی سمیت دیگر تمام احتجاجی مقدمات میں سرنڈر کیا تھا، جن میں ان کی جانب سے 32 مقدمات میں عبوری ضمانت کی درخواست دائر کی گئی تھی۔ عدالت نے تمام درخواستیں منظور کرتے ہوئے سماعت ملتوی کر دی۔
