پاکستان کے بالائی اور میدانی علاقے سخت سردی کی لپیٹ میں ہیں۔
محکمہ موسمیات کا بتانا ہے کہ کوئٹہ سمیت بلوچستان کے شمالی علاقوں میں درجہ حرارت نقطہ انجماد سے گرنے کے بعد تالاب، جوہڑ اور سڑکوں پر کھڑا پانی بھی جم گیا ہے۔
محکمہ موسمیات کے مطابق گزشتہ روز بلوچستان کے شمالی علاقوں میں سرد ہوائیں چلنے کی وجہ سے ضلع قلات میں پارہ منفی 7 ، کوئٹہ، زیارت میں منفی 6 اور نوکنڈی میں منفی 2 ڈگری سینٹی گریڈ ریکارڈ کیا گیا جبکہ مالم جبہ، چترال، دیر، مری، راولاکوٹ اور گلگت بلتستان کے کئی اضلاع میں بھی پارہ نقطہ انجماد سے نیچے چلا گیا۔
محکمہ موسمیات کا بتانا ہے کہ کوئٹہ، زیارت، قلات اور چاغی میں پارہ کئی روز سے نقطہ انجماد سے نیچے ہے جبکہ آئندہ ایک ہفتے تک سردی کی لہر برقرار رہنے کا امکان ہے۔
محکمہ موسمیات کی جانب سے آج صوبے کے بیشتر اضلاع میں موسم شدید سرد اور خشک رہنے کا امکان ظاہر کیا گیا ہے، قلعہ عبداللہ، پشین، کوئٹہ، زیارت، قلعہ سیف اللہ اور ژوب میں مطلع جزوی ابر آلود رہنے کا امکان ہے۔
