ممبر قومی اسمبلی لطیف کھوسہ کیخلاف ریاستی اداروں کیخلاف مبینہ نفرت پھیلانے، غلط بیانی کرنے پر مقدمہ درج کرلیا گیا ہے۔
مقدمہ ایف آئی اے سائبر کرائم میں درج ہوا، ذرائع کے مطابق لطیف کھوسہ کے وارنٹ گرفتاری کیلئے جج عباس شاہ کی عدالت میں درخواست جمع کرادی گئی ہے۔ ایف آئی آر میں یہ بتایا گیا ہے کہ مقدمہ پیکا قانون کے مختلف سیکشن کے تحت درج کیا گیا ہے۔
ایف ائی آر کے متن میں بتایا گیا ہے کہ لطیف کھوسہ نے اپنے ایک ویڈیو بیان میں بلوچستان اور کے پی کے ٹوٹنے کی بات کرکے ملک میں ایک فساد پھیلانے کی کوشش کی۔
ایف آئی آر میں لطیف کھوسہ پر جان بوجھ کر ریاستی اداروں کیخلاف نفرت انگیز بیان بازی کرنے کا الزام لگایا گیا ہے۔
دوسری جانب امیر جماعت اسلامی حافظ نعیم الرحمان کا کہنا ہے کہ حکومتی دعوؤں کے باوجود مہنگائی کم نہیں ہوئی۔
فیصل آباد میں میڈیا سے گفتگو کے دوران حافظ نعیم الرحمان نے کہا کہ پچھلے سال اگر 20 فیصد مہنگائی بڑھی تو اس سال اس ماہ میں 18 فیصد بڑھی ہے، فیصل آباد میں پچاس فیصد سے زائد ملیں بند ہوگئی ہیں، ملیں بند ہونے سے ہزاروں لوگ بے روزگار ہو جاتے ہیں۔
