احتساب عدالت کی جانب سے ترقیاتی منصوبوں میں مبینہ کرپشن کے کیس میں چودھری پرویز الٰہی پر فرد جرم کیلئے 7 جنوری کی تاریخ مقرر کردی گئی۔
احتساب عدالت لاہور میں سابق وزیراعلی چودھری پرویز الٰہی و دیگر کے خلاف ریفرنس کی سماعت ہوئی، جج زبیر شہزاد کیانی کی جانب سے کیس کی سماعت کی گئی۔
چودھری پرویزالہیٰ عدالت پیش نہ ہوسکے، جب عدالت کی جانب سے استفسار کیا گیا کہ آج پرویز الہٰی کیوں پیش نہیں ہوئے؟ اس موقع پر ان کے وکیل نے عدالت کو بتایا کہ وہ کل شام باتھ روم میں پھسل کر گر گئے تھے، ان کی کمر اور ٹخنے پر چوٹ آئی ہے۔
نیب پراسیکیوٹر نے کہا کہ فرد جرم سے بچنے کے لئے ہر تاریخ پر یہ میڈیکل پیش کر دیتے ہیں، عدالت نے استفسار کیا کہ کیا جو ملزم موجود ہیں ان پر فرد جرم عائد کی جا سکتی ہے؟
پراسیکیوٹر کے مطابق ملزمان پر الگ الگ فرد جرم عائد ہو سکتی ہے جس پر شریک ملزم محمد خان بھٹی کے وکیل نے پراسیکیوشن کی مخالفت کی اور کہا کہ الگ الگ فرد جرم عائد نہیں ہوسکتی۔
چودھری پرویز الٰہی کے وکیل کے مطابق پرویز الہٰی مرکزی ملزم ہیں ان کی عدم موجودگی کی صورت میں دیگر ملزمان پر فرد جرم عائد نہیں ہو سکتی، وکیل نے کارروائی ملتوی کرنے کی استدعا کی۔
اسکے بعد احتساب عدالت نے شریک ملزم محمد خان بھٹی سمیت دیگر پر فرد جرم عائد کرتے ہوئے پرویز الہٰی پر فرد جرم کیلئے 7 جنوری کی تاریخ مقررکر دی۔
