اسلام آباد، سپیکر قومی اسمبلی سردار ایاز صادق کی جانب سے ایک مرتبہ پھر مذاکرات کو ہی مسائل کا حل قرار دیدیا گیا۔
اسلام آباد میں سپیکرز کانفرنس سے خطاب کے دوران سپیکر قومی اسمبلی سردار ایاز صادق کا کہنا تھا کہ کم بولنا اور درگزر کرنا سپیکرز کیلئے لازم ہے، کسی ممبر کیساتھ بات کو الجھاؤ میں مت لے کر جائیں، سپیکر اور جج بہت ذمہ داری کا کام ہے، اس کی پکڑ بھی بہت ہے۔
ایاز صادق نے کہا کہ بطور سپیکر اتنے راز ہیں اگر کہیں کہہ دوں تو بعض ممبران کو آئندہ ٹکٹ تک نہ ملے مگر یہ راز ہمارے سینے میں دفن ہیں، ہم پر ذمہ داری زیادہ ہے، ایم این ایز کیساتھ سابق ممبران کیلئے بھی ہمارے دروازے ہمیشہ کھلے رہنے چاہئیں۔
اسپیکر قومی اسمبلی نے کہا کہ ہمیں اپنے اداروں کو مضبوط بنانا ہے، ہمیں ماحول کو ٹھنڈا رکھنا اور راستہ بنانا ہے، ہمیں مل جل کر تلخیوں کو بھی کم کرنا ہوگا، مذاکرات، مذاکرات اور مذاکرات ہی مسائل کا حل ہیں، مسائل کے حل سے ہی جمہوریت آگے بڑھے گی اور مستحکم ہوگی۔
ایاز صادق نے کہا کہ مسائل ہمیشہ بیٹھ کر اور مذاکرات کے ذریعے ہی حل ہوتے ہیں، ضروری نہیں ہے کہ ہر مسئلہ حل ہو جائے یا ہر شرط مانی جائے، ہمیں ایک دوسرے کو عزت دینی ہے، اسی طرح ہم آگے بڑھ سکتے ہیں۔