پشاور، مشیر اطلاعات خیبرپختونخوا بیرسٹر ڈاکٹر سیف کا کہنا ہے کہ جعلی حکومت کرم کے حالات پر تماشا دیکھنا بند کرے۔
اپنے ایک بیان میں مشیر اطلاعات خیبر پختونخوا بیرسٹر سیف نے کہا کہ جعلی وفاقی حکومت دور سے کرم کے حالات کا تماشہ دیکھ رہی ہے، اپنی ذمہ داریاں نبھانے کے بجائے دور سے تماشہ دیکھنا اور سیاسی بیان بازی بند کرے، کرم بھی پاکستان کا حصہ ہے ایران یا افغانستان کا نہیں۔
مشیر اطلاعات کے پی نے کہا کہ جعلی وفاقی حکومت کو فرقہ واریت اور صوبائیت کو ہوا دینے میں دلچسپی ہے، وزیر داخلہ کو سمجھایا جائے کہ آپ صرف وفاقی دارالحکومت اسلام آباد کے وزیر داخلہ نہیں ہیں، ملک کے تمام اندرونی معاملات کی ذمہ داری وزیرداخلہ کی ہوتی ہے۔
بیرسٹر سیف نے کہا کہ کرم کے سنگین حالات پر کوئی توجہ نہیں، کرم ایک سرحدی علاقہ ہے، وزیر دفاع خواجہ آصف کی بھی کچھ ذمہ داریاں بنتی ہیں، جعلی وزیر دفاع بدتمیزانہ بیانات کی بجائے اپنی ذمہ داری پر توجہ دیں، فارم 47 کی بجائے فارم 45 کے اصلی وزیراعظم ہوتے تو اب تک کرم کے لئے ایئر ایمبولینس کا انتظام ہو چکا ہوتا۔
صوبائی مشیر اطلاعات نے کہا کہ وزیراعلیٰ علی امین گنڈاپور اپنے ہیلی کاپٹر کو کرم کے لئے ایئرایمبولینس کے طور پر استعمال کر رہے ہیں، مریم نواز کی جانب سے ایئر ایمبولنس کے دعوے ابھی تک حقیقت نہیں بنے، یہی فرق فارم 45 اور فارم 47 کے وزرائے اعلیٰ میں ہے۔
رہنما پی ٹی آئی نے کہا کہ فارم 45 کے وزیراعلیٰ عملی کام پر یقین رکھتے ہیں جبکہ فارم 47 کی جعلی وزیراعلیٰ جھوٹے دعوے کرتی ہیں۔
