اسلام آباد، سابق وزیراعظم شاہد خاقان عباسی کا کہنا ہے کہ ملک میں تمام خرابیوں کی وجہ الیکشن چوری ہے،عوام کو ملک کا فیصلہ کرنے دیں۔
سابق وزیراعظم شاہد خاقان عباسی نے وکلا سے خطاب کے دوران کہا کہ عوام کو فیصلہ نہیں کرنے دیں گے تو ملک کیسے چلے گا؟ سیاسی انتشار ہوگا تو ملک آگے نہیں بڑھ سکتا، رول آف لا نہیں ہوگا تو معیشت ترقی نہیں کرے گی۔
سابق وزیراعظم کا کہنا تھا کہ سیاسی نظام کی ناکامی اور ترقی نہ کرنا مہنگائی کی وجہ ہے، ہم آئی ایم ایف کو خود کہتے ہیں ہم نالائق ہیں، خود معیشت چلانے کے قابل ہوں تو آئی ایم ایف کی کوئی ضرورت نہیں، جن ملکوں نے اپنا نظام نہیں بدلا انہوں نے ترقی نہیں کی۔
شاہد خاقان عباسی کا کہنا تھا کہ شہری ٹیکس نہیں دیں گے تو ملک کیسے چلے گا؟
دوسری جانب قومی اسمبلی میں قائد حزب اختلاف عمر ایوب نے پشاور ہائی کورٹ کے باہر میڈیا سے گفتگو کے دوران کہا کہ مذاکراتی کمیٹی عمران خان نے تشکیل دی ہے۔
عمر ایوب نے کہا کہ لگتا ہے حکومت کو مذاکرات میں کوئی دلچسپی نہیں ہے،ہم کسی سے ڈرنے والے نہیں ہیںاور نہ ہم نے کسی کے پاس جانا ہے، اگر کسی نے مذکرات کرنے ہیں تو کریں نہیں تو نہ کریں۔
