پشاور، چیئرمین مرکزی رویت ہلال کمیٹی مولانا عبدالخبیر آزاد کا کہنا ہے کہ پاکستان جن چیلنجرز سے گزر رہا ہے اس میں ہمیں اتحاد کی اشد ضرورت ہے، وطن سے محبت ایمان کا حصہ ہے۔
پشاور میں پیغام امن کانفرنس سے خطاب کے دوران چیئرمین مرکزی رویت ہلال کمیٹی مولانا عبدالخبیر آزاد کا کہنا ہے کہ پاکستان اللہ تعالیٰ کی نعمت عظمٰی ہے، جو کردار ہمارے بزرگوں نے پاکستان کو بنانے کے لئے ادا کیا وہ ہمیں بچانے کے لئے کرنا ہوگا۔
مولانا عبدالخبیر آزاد کا کہنا ہے کہ کرم سمیت دیگر واقعات میں سکیورٹی فورسز،عام لوگوں نے جانوں کے نذرانے پیش کئے انہیں سلام پیش کرتے ہیں، خیبرپختونخوا، بلوچستان، پنجاب، سندھ، گلگت بلتستان، آزاد جموں کشمیر یہ سب ایک پاکستان ہے۔
چیئرمین مرکزی رویت ہلال کمیٹی نے کہا کہ پیغام پاکستان کے فتویٰ کو ہر گھر کی آواز بنائیں، دہشت گردی، فرقہ واریت کو پیغام امن فتویٰ میں حرام قرار دیا ہے، حکومت اور علما کرام کے مابین مذاکرات کا جلد نتیجہ نکلے گا۔
مولانا عبدالخبیر آزاد کا کہنا ہے کہ آج ہماری افواج کے جوان پاکستان میں امن کے استحکام کے لئے جانیں دے رہے ہیں، ہمیں بھی پاکستان میں امن و امان کے لئے کردار ادا کرنا ہوگا۔
