یونان میں کشتیاں الٹنے کے واقعے میں زندہ بچ جانیوالے پاکستانیوں کی جانب سے سنسنی خیز انکشافات کیے گئے ہیں۔
13 دسمبر کو یونان کے جزیرہ کریٹ کے جنوب میں کشتیاں الٹنے کا واقعہ پیش آیا تھا، جس میں 4 پاکستانیوں کے جاںبحق ہونے کی تصدیق ہوئی تھی۔
اب حادثے میں بچ جانیوالے پاکستانیوں کی جانب سے انکشاف کرتے ہوئے بتایا گیا کہ جمعہ اور ہفتے کی درمیانی شب حادثہ پیش آیا، سمندر میں حالات بہت خراب تھے، شپ میں 84 افراد سوار تھے، حادثے میں درجنوں پاکستانی ہماری آنکھوں کے سامنے سمندر میں ڈوب گئے۔
متاثرین کی جانب سے انکشاف کیا گیا کہ جس کشتی پر سوار تھے اس کا نہ انجن ٹھیک تھا، نہ واکی ٹاکی اور نہ ہی ڈرائیور ٹھیک تھا، حادثے کے بعد کارگو شپ نے ہمیں بچایا، ہمارے کپڑے، موبائل اور جوتے سب وہاں رہ گئے، اب ہمارے پاس کپڑے ہیں اور نہ ہی جوتے۔
متاثرین کے مطابق ہم اس وقت یونان کے کیمپ میں مقیم ہیں، پاکستان سے لیبیا پہنچے تھے وہاں ڈیڑھ 2 مہینے بہت مشکل میں گزارے اور لیبیا میں ڈیڑھ 2 مہینے رہے، وہاں سے 11 دسمبر کو شپ نکلی تھی۔
