لاہور، گورنر پنجاب سلیم حیدر کا کہنا ہے کہ اتحادی حکومت بس چل رہی ہے، اللہ خیر کرے گا۔
گورنر پنجاب سلیم حیدر نے میڈیا سے گفتگو کے دوران کہا کہ وزیر اعلیٰ پنجاب اور میرے درمیان کوئی تناؤ نہیں چل رہا، اتحادی حکومت بس چل رہی ہے، اللہ خیر کرے گا۔
سلیم حیدر نے کہا کہ طاقتور لوگوں کو پہلے خود کو ٹھیک کرنا ہو گا اور پھر طاقتور کو اپنی نیت کو ٹھیک کرنے کی ضرورت ہے، ہماری نیت ٹھیک تھی تو ہم نے ایٹم بم بنا دیا۔
گورنر پنجاب کا کہنا تھا کہ میں کرپشن کی بات کر رہا ہوں تو مجھے اپنے کردار کو بھی دیکھنا ہو گا اور میں چاہتا ہوں جب گورنر ہاؤس چھوڑوں تو سر اٹھا کر جاؤں۔
کسانوں کے حوالے سے گفتگو کرتے ہوئے گورنر پنجاب کا کہنا تھا کہ کسی حکومت نے کبھی کسان کو سپورٹ نہیں کیا۔ اور عالمی مالیاتی ادارے (آئی ایم ایف) کے کہنے پر 45 فیصد ٹیکس زراعت پر لگانا پڑ رہا ہے۔
سلیم حیدر نے کہا کہ پاکستان کے خلاف اندرونی اور بیرونی سازشیں ہو رہی ہیں، تاہم قوم دہشت گردی کے خاتمے کے لیے سیکیورٹی فورسز کے ساتھ کھڑی ہے۔
مافیا کے حوالے سے گفتگو کرتے ہوئے گورنر پنجاب نے کہا کہ مافیا اتنا طاقتور ہے کہ اعلیٰ عہدوں والے بھی ان سے بچ نہیں سکتے اور مافیا کے لوگ عدالتوں سے اسٹے لے آتے ہیں۔
