پی آئی اے کی جانب سے بین الاقوامی ٹکٹوں کی قیمتوں میں کمی کا اعلان کر دیا گیا ہے۔
نیشنل میڈیا کے مطابق آئی ایم ایف نے پاکستان انٹرنیشنل ائیر لائن کے بین الاقوامی ٹکٹوں پر فیڈرل ایکسائز ڈیوٹی کی چھوٹ کی منظوری دی ہے، جس سے کرایوں میں نمایاں کمی کی راہ ہموار ہوگئی۔
پی آئی اے کے مقامی چیپٹر کے ذرائع کے مطابق یہ چھوٹ پاکستانی حکومت کی درخواست پر دی گئی تھی اور اس کے نتیجے میں مسافروں کی خاطر خواہ بچت ہو سکتی ہے۔
امریکہ جانیوالے مسافروں کو 350,000 روپے تک کی بچت ہونے کا امکان ہے، جبکہ افریقہ اور مشرق وسطیٰ کے ٹکٹ کی قیمتوں میں 105,000 روپے تک کی کمی ہوگی۔
یورپ، آسٹریلیا، نیوزی لینڈ اور مشرق بعید کے لیے سفر کرنیوالوں کو ٹکٹ پر 210,000 روپے تک کی بچت ہو سکتی ہے، یاد رہے کہ پی آئی اے آئندہ مہینے پیرس کے لیے دوبارہ آپریشن شروع کرے گی۔
فرانس میں پاکستانی سفارتخانے سے جاری ہونے والے بیان کے مطابق فرانس میں پاکستان کے سفیر عاصم افتخار احمد نے جنوری 2025 میں آپریشنل ہونے والی پروازوں کی تیاریوں سے متعلق پی آئی اے کے مارکیٹنگ کے نمائندے سے ملاقات کی۔
