سربراہ پشتونخوا ملی عوامی پارٹی اور ممبر قومی اسمبلی محمود خان اچکزئی نے پی ٹی آئی سے سول نافرمانی کی تحریک مؤخر کرنے کی اپیل کر دی۔
محمود خان اچکزئی نے کہا کہ حکومت کیساتھ مذاکرات وقت کی اہم ضرورت ہیں، پاکستان تحریک انصاف سے اپیل ہے کہ سول نافرمانی کی تحریک مؤخر کر دیں۔
ممبر قومی اسمبلی نے کہا کہ پی ٹی آئی کو مشورہ دیا ہے کہ مذاکرات میں طے ہونا چاہیے کہ حکومت کب ہٹے گی، بات چیت سے مسائل کا حل نکلے تو اس سے اچھی کوئی اور بات نہیں ہے، اگر بات چیت سے مسائل حل نہیں ہوتے تو تحریک چلانی پڑے گی۔
محمود خان اچکزئی کا کہنا ہے کہ مذاکرات کی کامیابی کی صورت 4 ماہ میں انتخابات کا مطالبہ کرتا ہوں۔
ذرائع کے مطابق گزشتہ روز ہونیوالے اپوزیشن اتحاد کے اجلاس میں محمود خان اچکزئی نے کہا کہ بغیر حکمت عملی چڑھ دوڑنے سے بہتر ہے ضلعی سطح پر احتجاج ہو، رہنماؤں کے نرم رویے سے اپنا ہی نقصان ہوا، پی ٹی آئی قیادت کے فیصلوں میں ابہام سے نقصان ہوا۔
ذرائع کے مطابق محمود خان اچکزئی نے عمران خان کی رہائی کیلئے حکمت عملی کے فقدان کی نشاندہی کی۔
ذرائع کا بتانا ہے کہ اپوزیشن اتحاد نے ماضی قریب میں تحریک انصاف کے سولو فلائٹ کے بیانات کا ذکر کیا۔
واضح رہے کہ بانی پی ٹی آئی عمران خان نے 14 دسمبر سے ملک میں سول نافرمانی کی تحریک شروع کرنے کا اعلان کیا تھا جبکہ پی ٹی آئی رہنماؤں کا اس حوالے سے کہنا ہے کہ اگر حکومت کے ساتھ مذاکرات کامیاب نہیں ہوتے تو سول نافرمانی کی تحریک پر ہر صورت عمل درآمد ہوگا۔
