34
شیخوپورہ، وفاقی وزیر برائے صنعتی پیداوار اور رہنما مسلم لیگ رانا تنویر حسین کا کہنا ہے کہ پی ٹی آئی نے حکومت سے مذاکرات کے لیے جو شرائط رکھی ہیں وہ سمجھ سے بالاتر ہیں۔
شیخوپورہ میں واٹر فلٹریشن سکیم کے افتتاح کے موقع پر میڈیا سے گفتگو کے دوران وفاقی وزیر رانا تنویر نے کہا کہ تحریک انصاف کی شرائط پر عمل کرنا ممکن نہیں، تحریک انصاف کی سول نافرمانی کی تحریک میں عوام ساتھ نہیں دے گی۔
رانا تنویر حسین نے کہا کہ سابق وزیراعظم عمران خان کے کہنے پر ہی سب کچھ ہوتا ہے تو وہی قصوروار ہیں، رینجرز اہلکاروں کی شہادت سے متعلق عدالتیں آزاد ہیں امید ہے قانون کے مطابق فیصلہ دیں گی۔
وفاقی وزیر برائے صنعتی پیداوار کا کہنا ہے کہ معیشت کی ترقی میں کسان ریڑھ کی ہڈی کی حیثیت رکھتے ہیں، تحریک انصاف کی کسان دشمن پالیسیوں نے زراعت کو شدید نقصان پہنچایا۔
کسانوں کی بہتری کیلئے حکومت دن رات کوشاں ہے، ٹریکٹر کی فراہمی کیلئے پنجاب حکومت 10 لاکھ روپے تک سبسڈی دے رہی ہے۔
