اسلام آباد کی انسداد دہشتگردی عدالت نے ڈی چوک پر تحریک انصاف کے احتجاج کے دوران زیر حراست 32 ملزمان کو کیسز سے ڈسچارج کر دیا۔
ڈی چوک احتجاج میں زیر حراست 32 ملزمان کو شناخت پریڈ کے لیے رات گئے انسداد دہشتگردی عدالت کے جج ابو الحسنات ذوالقرنین کی عدالت میں پیش کیا گیا۔
رات دیر گئے ملزمان کو شناخت پریڈ کے لیے جہلم جیل سے پیش کرنے پر جج ابو الحسنات ذوالقرنین کی جانب سے برہمی کا اظہار کیاگیا۔ ملزمان کی جانب سے ان کے وکیل انصر کیانی پیش ہوئے۔
تفتیشی افسر کے مطابق ملزمان کو 25 نومبر کو گرفتار کیا گیا لیکن شناخت پریڈ نہ ہو سکی، ملزمان کا 30، 30 دن کا جسمانی ریمانڈ منظور کیا جائے۔
وکیل صفائی انصر کیانی نے کہا کہ پولیس نے نمبر پورے کرنے کیلئے مزدوروں کو گھروں سے گرفتار کیا۔
عدالت کی جانب سے کمرہ عدالت میں 32 ملزمان کی ہتھکڑیاں کھلوا کر انہیں کیسز سے ڈسچارج کر دیا گیا۔
جج ابوالحسنات ذوالقرنین کی جانب سے ریمارکس دیے گئے کہ پولیس نے انہیں دوبارہ گرفتار کیا تو پولیس والوں کو ہتھکڑی لگوا دوں گا۔
واضح رہے کہ پولیس نے ڈی چوک سے گرفتار 32 ملزمان کی تھانہ آئی نائن اور تھانہ مارگلہ کے کیسز میں ملزمان کی گرفتاری ظاہر کی تھی۔
