لاہور، انسداد دہشتگردی عدالت نے 9 مئی کے ایک کیس میں تحریک انصاف کے 8 روپوش رہنماؤں کو اشتہاری قرار دیدیا۔
9 مئی کو کلمہ چوک پر کینٹینر جلانے کے کیس میں پیش رفت سامنے آئی ہے، جس میں صوبائی دارالحکومت لاہور کی انسداد دہشتگردی عدالت کی جانب سے 8 روپوش رہنماؤں کو اشتہاری قرار دیدیا گیا۔
عدالت کی جانب سے پی ٹی آئی رہنما اسلم اقبال، حماد اظہر، مراد سعید، زبیر نیازی، حامد رضا گیلانی، محمد جاوید،عبد الصمد اور واثق قیوم کو بھی اشتہاری قرار دیا گیا ہے۔
عدالت نے پی ٹی آئی رہنماؤں کے دائمی وارنٹ گرفتاری بھی جاری کردیئے ہیں۔
انسداد دہشتگردی عدالت نے تھانہ نصیر آباد میں درج مقدمے میں پولیس کی درخواست پر کارروائی کی، جس میں پولیس کی جانب سے مؤقف اختیار کیا گیا کہ ملزمان گرفتاری کے ڈر سے روپوش ہو چکے ہیں۔
دوسری جانب اسلام آباد کی انسداد دہشتگردی عدالت نے ڈی چوک پرتحریک انصاف کے احتجاج کے دوران زیر حراست 32 ملزمان کو کیسز سے ڈسچارج کر دیا۔
ڈی چوک احتجاج میںزیر حراست 32 ملزمان کو شناخت پریڈ کے لیے رات گئے انسداد دہشتگردی عدالت کے جج ابو الحسنات ذوالقرنین کی عدالت میں پیش کیا گیا۔
