ن لیگی سینیٹر عرفان صدیقی کا کہنا تھا کہ سول نافرمانی کی تلوار لٹکانے سے مذاکرات نہیں ہوتے۔
اسلام آباد، مسلم لیگ ن کے سینیٹر عرفان صدیقی نے تحریک انصاف کو پیغام دیا ہےکہ سول نافرمانی کی تلوار لٹکانے سے مذاکرات نہیں ہوتے، ایسا نہ کریں، اگر تحریک انصاف بات کرنا چاہتی ہے تو سو بسم اللہ ہم تیار ہیں۔
سینیٹ اجلاس میں اظہار خیال کرتے ہوئے سینیٹر عرفان صدیقی کا کہنا تھا کہ پرامن احتجاج سیاسی جماعت کا آئینی حق ہے، لیکن کیا پرامن احتجاج الجہاد اور مارو کے نعروں سے ہوتا ہے؟ کہاں ایسا پرامن احتجاج کیا جاتا ہے جہاں آپ آنسو گیس لے کر چلیں، کہاں پرامن احتجاج کیا جاتا ہے جہاں مارو یا مر جانےکا نعرہ لگا کر چلیں؟
عرفان صدیقی نے کہا کہ اس بار احتجاج کی کوئی درخواست نہیں دی گئی، کوئی اجازت نہیں مانگی گئی، ہم نے مذاکرات کے کبھی دروازے بند نہیں کیے، ہم چاہتے ہیں بات ہو، ہم بات چیت کے لیے تیار ہیں۔
مسلم لیگ (ن) کے سینیٹر نے کہا کہ برف پڑ ضرور رہی ہے لیکن پگھلی نہیں ہے، پہلے بھی مذاکرات کے لیے ان کی ٹیم خوشی خوشی گئی تو بانی پی ٹی آئی نے مذاکرات سے انکار کردیا تھا۔
دوسری جانب گزشتہ روز حکومت اور تحریک انصاف کا مذاکرات کے لیے اپنی اپنی پارٹیوں میں سخت گیر مؤقف رکھنے والوں کو سمجھانے پر اتفاق ہوا ہے۔
