33
کراچی سمیت ملک بھر کے صارفین کیلئے سہ ماہی ایڈجسٹمنٹ میں بجلی منہگی کردی گئی۔
نیشنل الیکٹرک پاور ریگولیٹری اتھارٹی (نیپرا) نے رواں مالی سال کی پہلی سہ ماہی ایڈجسٹمنٹ کے تحت بجلی کی قیمت میں 20 پیسے فی یونٹ اضافے کا نوٹیفکیشن جاری کر دیا ہے۔ اس اضافے سے صارفین پر 1 ارب 18 کروڑ 70 لاکھ روپے کا اضافی بوجھ پڑے گا۔
نوٹیفکیشن کے مطابق یہ سہ ماہی ایڈجسٹمنٹ دسمبر 2024 کے بل میں صرف ایک ماہ کے لیے نافذ ہوگی۔ تاہم، لائف لائن اور پری پیڈ صارفین کو اس اضافے سے استثنیٰ دیا گیا ہے، اور ونٹر پیکج کے تحت بجلی کے اضافی استعمال پر بھی سہ ماہی ایڈجسٹمنٹ لاگو نہیں ہوگی۔
یاد رہے کہ گذشتہ مالی سال کی آخری سہ ماہی ایڈجسٹمنٹ کی وصولی نومبر میں ختم ہوئی تھی، جس میں ایک روپے 74 پیسے فی یونٹ اضافے کا اطلاق کیا گیا تھا۔
یہ اضافہ توانائی کے بڑھتے ہوئے اخراجات اور مالیاتی دباؤ کے باعث کیا گیا ہے، جو صارفین کے لیے مزید معاشی چیلنجز پیدا کرے گا۔
