کراچی، وزیر اعلیٰ سندھ سید مراد علی شاہ کا کہنا ہے کہ سیلاب متاثرین کے لیے 21 لاکھ سے زائد گھر بنائے جائیں گے۔
وزیر اعلیٰ سندھ سید مراد علی شاہ نے میڈیا سے گفتگو کے دوران کہا کہ سندھ میں پیپلز پارٹی نے اس بار پہلے سے زیادہ سیٹیں لیں اور ہماری کوشش ہے کہ عوام کو سہولیات فراہم کریں۔
مراد علی شاہ کا کہنا تھا کہ ہمارے پاس سندھ اسمبلی میں دوتہائی سے زائد سیٹیں ہیں اور2 تہائی اکثریت ہونے کے باوجود اپوزیشن کی تجاویز کو دیکھتے ہیں، پبلک پرائیویٹ پارٹنر شپ کے تحت کئی منصوبے شروع کیے ہیں۔
مراد علی شاہ نے کہا کہ سیلاب متاثرین کے لیے 21 لاکھ سے زائد گھر بنائے جائیں گے، جس میں سے 8 لاکھ گھر تعمیر ہو چکے ہیں اور یہ دنیا کا سب سے بڑا ہاؤسنگ پراجیکٹ ہے۔
وزیراعلیٰ سندھ کا کہنا تھا کہ تھر کے کوئلے سے سستی بجلی پیدا کی جا رہی ہے اور ملک میں دہشتگردی کی ایک اور لہر آئی ہوئی ہے، خیبر پختونخوا اور بلوچستان دہشتگردی سے زیادہ متاثر ہیں۔
دوسری جانب وفاقی وزیر اطلاعات ونشریات عطا تارڑ کا کہنا ہے کہ ملک میں انتشار پھیلانے والوں کا بندوبست کیا جائے گا۔
