اسلام آباد، وفاقی وزیر اطلاعات و نشریات عطا تارڑ کا کہنا ہے کہ ملک میں انتشار پھیلانے والوں کا بندوبست کیا جائے گا۔
وفاقی کابینہ کے اجلاس کے بعد پریس کانفرنس کے دوران وفاقی وزیر اطلاعات عطا تارڑ نے کہا کہ سابق وزیراعظم عمران خان کی سول نافرمانی کی تحریک کو خیبرپختونخوا کی کابینہ نے مسترد کردیا ہے، یہ پہلی بار ہوا ہے کہ کسی نے سیاسی مفاد سے زیادہ ترجیح قومی مفاد کو دی ہے۔
وزیر اطلاعات کا کہنا تھا کہ صحافیوں کو آن لائن ہراساں اور ٹارگٹ کرنے کی مہم ناقابل برداشت ہے، صحافیوں کے خاندانوں تک رسائی حاصل کرکے انہیں دھمکانے کی بات کی جارہی ہے، ہم نے پالیسی فیصلہ کرلیا ہے ایسے لوگوں کو کوئی رعایت نہیں دی جائے گی۔
عطا تارڑ کا کہنا تھا کہ پی ٹی آئی نے فوجی کمپنیوں کی مصنوعات کے بائیکاٹ کی اپیل تو کردی لیکن انہوں نے کبھی اسرائیلی کمپنیوں کے بائیکاٹ کی بات نہیں کی، یہ لوگ فلسطین کے حق میں ہونیوالی اے پی سی میں بھی شریک نہیں ہوئے۔
ن لیگی رہنما کا کہنا تھا کہ گولڈ سمتھ کی فنڈنگ لینے کی یہ مجبوریاں ہیں، یہ ملکی مصنوعات کے پیچھے پڑے ہیں جو سستی ہیں اور عوام استعمال کرتے ہیں، آئندہ بھی کریں گے، جو کچھ یہ کر رہے ہیں یہ سب گولڈ سمتھ کا ایجنڈا ہے۔
وفاقی وزیر کا کہنا تھا کہ فوج کے افسران اور جوان روز شہید ہو رہے ہیں، امن کے لیے قربانیاں دے رہے ہیں، جو بھی فوج اور سلامتی کے اداروں کو کمزور کرتا ہے وہ پاکستان کے مخالف ملکوں کے پروپیگنڈے کے ساتھ ہوتا ہے۔
عطا تارڑ نے کہا کہ 9 مئی بھی اسی سلسلے کی سازش تھی کہ فوج پر حملے کرو، انہیں اتنا کمزور ثابت کردیا جائے کہ دشمن کو بھی آسانی ہوسکے، آپ میں اتنی ہمت ہے کہ آپ پاک فوج سے ٹکر لے سکیں؟ ایک صاحب کہا کرتے تھے کہ ہم ٹکر کے لوگ ہیں، وہ کدھر ہیں؟
وزیر اطلاعات کا کہنا تھا کہ ٹریک اینڈ ٹریس سسٹم سے ایسے عناصر کی شناخت کر رہے ہیں جو باہر بیٹھ کر پاکستان کی ساکھ خراب کر رہے ہیں، کیا دنیا کے کسی ملک میں دفاعی اداروں کی اس طرح تضحیک کی اجازت ہے؟ آپ ہم پر اور حکومت کی کارکردگی پر تنقید کریں۔
