چوہدری مونس الٰہی کو عدالت نے دہرے قتل کے مقدمہ میں اشتہاری قرار دے دیا۔
گجرات، رہنما پی ٹی آئی اور سابق وفاقی وزیر چودھری مونس الٰہی کو عدالت کی جانب سے دہرے قتل کے مقدمہ میں اشتہاری قرار دے دیا گیا۔
نجی ٹی وی چینل کے مطابق گجرات کے ایڈیشنل سیشن جج میاں جاوید اکرم نے چودھری مونس الٰہی کو اشتہاری قرار دیا، سابق وفاقی وزیر چودھری مونس الٰہی سمیت دیگر ملزمان پر 28 جون 2023 کو چکریاں کے رہائشی یاسر اور محمد یوسف کو فائرنگ کرکے قتل کرنے کا الزام تھا۔
پولیس کا کہنا ہے کہ اسی کیس میں نامزد ملزم محمد اختر دوران ٹرائل جیل میں وفات پاگیا تھا، مونس الٰہی کو ایف آئی آر کے ملزمان کے انکشاف کے بعد اس کیس میں نامزد کیا گیا تھا۔
مونس الٰہی کو دفعہ 109 کے تحت ایما مشورہ کا ملزم نامزد کیا گیا تھا۔
یاد رہے کہ تھانہ منگووال میں دہرے قتل کا مقدمہ 29 جون 2023 کو درج ہوا تھا، مقدمہ میں چودھری مونس الٰہی کو اشتہاری قرار دینے کا فیصلہ 19 صفحات پر مشتمل ہے۔
