پاکستان تحریک انصاف ( پی ٹی آئی) رہنماؤں کی اکثریت فوری طور پر سول نافرمانی تحریک کی حامی نہیں۔
ذرائع کے مطابق رہنماؤں اور کورکمیٹی کی سول نافرمانی کی تحریک پر مشاورت ہوئی۔
ذرائع کا بتانا ہے کہ پی ٹی آئی رہنماؤں کی اکثریت فوری طور پر سول نافرمانی تحریک کی حامی نہیں اور دسمبر میں سول نافرمانی تحریک کے بجائے پہلے اس پر پارٹی لائحہ عمل طے کرے گی۔
ذرائع کے مطابق ارکان کا مؤقف ہے عمران خان کے سامنے تحریک کی کال چند دن کیلئے مؤخر کرنے کا کہا جائے، پارٹی قیادت 24 نومبر احتجاج کے نتائج کے بعد دوبارہ ریکور ہونا چاہتی ہے۔
پارٹی ذرائع کے مطابق عمران خان سے ملاقات کے بعد کال پر پارٹی قیادت دوبارہ مشاورت کرے گی۔
واضح رہے کہ چند روز پہلے عمران خان کی ہمشیرہ علیمہ خان نے میڈیا سے گفتگو کے دوران کہا کہ عمران خان نے ہدایت کی ہے کہ اگر اسٹیبلشمنٹ سے مذاکرات ناکام ہوتے ہیں تو پھر سول نافرمانی کی تحریک شروع کریں گے۔
سابق وزیراعظم عمران خان نے اپنے مطالبات کیلئے 14دسمبر تک کا وقت دے رکھا ہے۔
