سپریم کورٹ کی جانب سے الیکشن کمیشن کا فیصلہ معطل کرتے ہوئے عادل بازئی کی قومی اسمبلی کی رکنیت بحال کر دی گئی۔
جسٹس منصور علی شاہ کی سربراہی میں 3 رکنی بینچ کی جانب سے عادل بازئی کی درخواست پر سماعت کی گئی، جسٹس عقیل عباسی اور جسٹس عائشہ ملک بھی 3 رکنی بینچ کا حصہ تھے۔
سپریم کورٹ نے عادل بازئی کو ڈی سیٹ کرنے کا الیکشن کمیشن کا 21 نومبر کا فیصلہ معطل کر دیا ہے۔
عدالت عظمیٰ کی جانب سے عادل بازئی کی قومی اسمبلی کی رکنیت بحال کرتے ہوئے کیس کی سماعت 12 دسمبر تک ملتوی کر دی گئی ۔
واضح رہے کہ الیکشن کمیشن نے اسپیکر قومی اسمبلی سردار ایاز صادق کی درخواست پر عادل بازئی کی قومی اسمبلی کی رکنیت معطل کی تھی۔
صدر مسلم لیگ (ن) میاں نواز شریف نے قومی اسمبلی میں پارٹی پالیسی سے انحراف کرتے ہوئے 26 ویں آئینی ترمیم کے لیے اپوزیشن بینچز میں جاکر بیٹھنے پر اسپیکر سردار ایاز صادق کو کارروائی کے لیے خط لکھا تھا۔
عادل بازئی کی جانب سے اسپیکر قومی اسمبلی کی درخواست پر کیے گئے الیکشن کمیشن کے فیصلے کے خلاف سپریم کورٹ سے رجوع کیاگیا تھا۔
