اسلام آباد، وزیراعظم پاکستان شہباز شریف کا کہنا ہے کہ طاقت کا غلط استعمال کرنے والے عوام کی محنت سے کمائی آمدنی لوٹتے ہیں مگر انہیں اپنے اعمال کے نتائج کا سامنا کرنا پڑتا ہے۔
انسداد کرپشن کےعالمی دن پر اپنے پیغام میں وزیراعظم شہباز شریف کا کہنا ہے کہ ہماری نوجوان نسل ایسے مستقبل کی مستحق ہے جو کرپشن سے پاک ہو، آنے والی نسلوں کے لیے شفاف معاشرے کے قیام کی کوششیں جاری رکھیں گے۔
وزیراعظم پاکستان کا کہنا تھا کہ کرپشن اور بدعنوانی گھناؤنا عنصر ہے، کرپشن ملک کی معاشی ترقی کو نقصان پہنچاتی ہے اور سماجی تانے بانے کو تباہ کردیتا ہے جب کہ کرپشن اوربدعنوانی منصفانہ حکمرانی اور مساوی مواقع کے فوائد سے لطف اندوز ہونے سے روکتا ہے۔
وزیراعظم پاکستان نے کہا کہ کرپشن اور بدعنوانی عوامی خدمات کی فراہمی کو بری طرح متاثر کرتے ہیں، بدعنوانی حکومتوں اور اس کے شہریوں کے درمیان عدم اعتماد کی بڑی وجہ ہے، طاقت کا غلط استعمال کرنیوالے عوام کی محنت سے کمائی آمدنی لوٹتے ہیں، مگر انہیں اپنے اعمال کے نتائج کا سامنا کرنا پڑتا ہے۔
شہباز شریف کا کہنا تھا کہ ہماری حکومت ہر سطح پر بدعنوانی کو جڑ سے اکھاڑ پھینکنے کے لیے پرعزم ہے، نیب اور دیگر قانون نافذ کرنے والے ادارے اس بات کو یقینی بنانے کے لیے انتھک محنت کر رہے ہیں۔
وزیراعظم پاکستان نے کہا کہ حکومت تنہا کرپشن کے خلاف جنگ نہیں جیت سکتی، ہر شہری، کمیونٹی اور ہر ادارے کی اجتماعی کوششوں کی ضرورت ہے۔
