ڈی آئی خان، وزیر اعلیٰ خیبر پختونخوا علی امین گنڈاپور کا کہنا ہے کہ دور دراز علاقوں میں ہیلتھ یونٹ کو فعال بنائیں گے۔
گومل میڈیکل کالج کے سالانہ کانووکیشن سے خطاب کے دوران وزیراعلیٰ پختونخوا نے کہا کہ ملک کو ایسی قیادت دیں جو اس ملک کو عظیم بنائے، میں نے کبھی کسی ڈاکٹر کی سفارش نہیں کی۔
وزیراعلیٰ پختونخوا کا کہنا ہے کہ دور دراز علاقوں میں ہیلتھ یونٹ کو فعال بنائیں گے، امن و امان کی صورتِ حال اور دور ہونے سے لوگ ڈیوٹی کرنے نہیں جاتے۔
علی امین گنڈا پور نے کہا کہ جن لوگوں نے تاریخ رقم کی انہوں نے کچھ معمول سے ہٹ کر کام کیا، آپ بھی وہی لوگ بنیں اور پسماندہ علاقوں میں جا کر خدمت کریں۔
وزیراعلیٰ کے پی کا یہ بھی کہنا ہے کہ مجھے خوشی ہے کہ چانسلر کی حیثیت سے موجود ہوں، اگر آپ کا ماضی ٹھیک نہیں ہے تو آپ اپنے حال کو ٹھیک کر لیں، جب دماغ سے سوچیں گے تو تمام مسائل حل ہو جائیں گے۔
دوسری جانب سیکرٹری جنرل پی ٹی آئی سلمان اکرم راجا نے کہا کہ سیاسی عمل اور گفتگو جاری ہے، ملک کی فلاح کے لیے جو بہتر ہوا وہ کریں گے۔
