وزیراعلیٰ خیبر پختونخوا نے احتجاج کے دوران گرفتار افراد کی رہائی کیلئے وزیراعظم پاکستان شہباز شریف کو خط لکھ دیا۔
پشاور، وزیراعلیٰ خیبر پختونخوا کی جانب سے اسلام آباد میں احتجاج کے دوران گرفتار افراد کی رہائی کیلئے وزیراعظم پاکستان شہباز شریف کو خط لکھ دیا گیا ہے۔
وزیراعلیٰ علی امین گنڈاپور نے خط میں صوبے کے شہریوں کی بلاجواز گرفتاریوں پر تشویش کا اظہار کیا۔
خط کے متن کے مطابق حالیہ واقعات کے بعد خیبر پختونخوا کے شہریوں کو نشانہ بنایا گیا، غیرقانونی زیر حراست خیبر پختونخوا کے شہریوں کو فوری رہا کیا جائے، نفرت کو ہوا دینے سے پاکستان پر طویل مدتی منفی اثرات مرتب ہوسکتے ہیں۔
خط کے مطابق ایسے اقدامات انصاف کے اصولوں کے منافی ہیں، سیاسی معاملات کو پرامن اور تعمیری مکالمے کے ذریعے حل کیا جائے۔
وزیراعلیٰ علی امین گنڈاپور نے خط میں یہ بتایا کہ وفاقی دارالحکومت اسلام آباد میں پشتون کمیونٹی کو طویل عرصے سے اہم چیلنجز کا سامنا ہے، پشتون کمیونٹی پر بے بنیاد مقدمات بنا کر پکڑ دھکڑ کی گئی۔
