اسلام آباد، وفاقی وزیر اطلاعات عطاء تارڑ کا کہنا ہے کہ پاکستان تحریک انصاف نوسر بازوں کی جماعت ہے، انہوں نے فیک ویڈیوز پھیلائی۔
اسلام آباد میں پریس کانفرنس کے دوران وفاقی وزیر اطلاعات و نشریات عطاء تارڑ نے کہا کہ تحریک انتشار گولی چلانے کا جھوٹا بیانیہ بنا رہی ہے، مظاہرین پرامن نہیں تھے، مسلح ہو کر آئے، پہلے اداروں کو نشانہ بناتے ہیں پھر پراپیگنڈا کرتے ہیں۔
عطاء تارڑ کا کہنا تھا کہ جھوٹا بیانیہ چلایا جا رہا ہے گولی کیوں چلائی، گولی تو کوئی نظر نہیں آئی، تحریک انتشار ایک ویڈیو لے آئے جس میں سیدھی فائرنگ کی گئی، یہ بری طرح ناکام ہوئے اب لاشوں کے پیچھے چھپنا چاہتے ہیں، قوم کیساتھ مذاق کا سلسلہ بند ہونا چاہیے۔
ن لیگی رہنما کا کہنا تھا کہ معیشت ترقی کر نہیں رہی معیشت کی ترقی ہوگئی ہے، مہنگائی 70 مہینے کی کم ترین سطح پر آگئی ہے، مہنگائی کا 4.8 فیصد پر آنا وزیراعظم شہباز شریف کی محنت ہے، اسٹاک مارکیٹ 1 لاکھ پوائنٹس کراس کر گئی ہے، ہم ڈیفالٹ کے دہانے سے اس مقام پر پہنچے ہیں۔
دوسری جانب رہنما جمیعت علمائے اسلام (جے یو آئی) حافظ حمد اللہ کا کہنا ہے کہ سابق وزیراعظم عمران خان کے پاس بار بار جا رہے ہیں لیکن وہ نئے الیکشن کی بات کرتے ہیں۔