ممبر قومی اسمبلی چوہدری نصیر عباس سدھو کا کہنا ہے کہ تحریک انصاف نے اپنی دم توڑتی ہوئی سیاست پر خود کش حملہ کیا ہے، قوم نے 24 نومبر کوانقلابیوں اور فسادیوں کو مسترد کر دیا۔
گجرات کے حلقہ این اے 65 سے مسلم لیگ ن کے ممبر قومی اسمبلی چوہدری نصیر عباس سدھو کا کہنا ہے کہ علاقہ کے مسائل کا حل ان کی اولین ترجیح ہے۔ حلقہ میں بلا تفریق کروڑوں روپے کی لاگت سے میگا پراجیکٹس پر کام جاری ہے۔
ان کا کہنا تھا کہ ڈو اینڈ ڈائی کی کال دینے والوں نے اپنی دم توڑتی ہوئی سیاست پر خود کش حملہ کیا ہے، قوم نے 24 نومبر کو انقلابیوں اور فسادیوں کو مسترد کر دیا۔ تحریک انصاف عوام کے کندھوں پر سوار ہو کر اپنے مفاد حاصل کرنا چاہتی ہے۔
انہوں نے کہا قومی جان چکی ہے ملک جب بھی ترقی کی راہ پر گامزن ہوتا ہے تو اس پارٹی کے پیٹ میں مروڑ اٹھنا شروع ہو جاتے ہیں۔
نصیرعباس سدھو کا کہنا تھا کہ جب بھی ملکوں کے سربراہان پاکستان میں سرمایہ کاری کی غرض سے آتے ہیں تو تحریک انصاف کی قیادت دھرنوں کی کال دے دیتی ہے۔
پاکستان کی قیادت اس وقت مضبوط ہاتھوں میں ہے، وہ وقت دور نہیں جب پاکستان کی معیشت بھی ٹیک آف کرے گی۔
چوہدری نصیر عباس نے حلقہ کو اپنے بھرپور تعاون کی یقین دہانی کروائی اور پارٹی کارکنوں اور رہنماؤں کی جانب سے بڑے اکٹھ اور اعتماد پر شکریہ بھی ادا کیا۔
